S2EP44 沙特哲學簡介（1）：沙特代表存在主義嘅「病」！？箇中病徵，就要由沙特嘅時代講起——法國淪陷，喺威權底下，重新定義自由丨《存在主義哲學新編》

今次，我要同大家分享嘅書係勞思光所寫嘅《存在主義哲學新編》。呢本書並唔多人注意，不過對於華文世界其實有住深刻嘅影響（深刻到無人留意到）——根據臺灣大學傅佩榮嘅講法，用「荒謬」翻譯absurd係始於勞思光，而佢呢個翻譯已經深入民心，以致大家日常中都鍾意荒謬前荒謬後咁講嘢——換言之，勞思光係最早期將存在主義引入華文世界嘅學者（之一）。

牛某希望分享勞思光呢部小書畀大家，等大家可以跟隨勞思光嘅步伐，進入存在主義哲學嘅大門。而入手嘅哲學家，就係沙特。我會分兩集嚟講（但兩集係一個整體，建議兩集聽晒）。

今集會簡單啲，內容包括：


「由德國到法國：存在主義嘅內部轉變」：我哋會簡單講講時代同地域變化點樣影響到存在主義有唔同嘅展現，特別係德國嘅海德格哲學同法國嘅沙特哲學。



「沙特式自由」：下一集，我哋先會講到「無」同「自由」喺概念上嘅關係，今集講嘅「自由」，更多係沙特嘅背景、時代點影響到佢講出一種獨特嘅自由——從抵抗而講嘅自由。主要會睇下沙特喺《沉默的共和國》嘅講法。