EP43 墨家好似宗教組織？墨子講天講鬼講兼愛，其實都係爲咗實現尚同社會｜《中國哲學史大綱》（三）

墨子雖然又有科學精神、又講邏輯，但其實佢諗法之中嘅宗教成份好重，依賴住天志，令佢可以奉獻個人俾天下、喺刻苦當中去品嚐甜美。呢層就唔知道係唔係因為墨子對於宗教嘅感召好大，定係佢因為當時嘅社會背景而借用宗教去將理念實踐。墨子以天志、兼愛、非攻、明鬼、非命、節葬、非樂、尚賢、尚同，簡單兩個字嘅概念，就對應時弊、對照出每一個尋常百姓卑微嘅仁心，呢個就係墨子對百姓困苦嘅體察、呢個就係墨子喺諸侯以外去建立一個追求和平嘅勢力嘅基礎。呢一集，我哋一齊用系統理解一下墨子由宗教感動而嚟嘅思想。內容包括：

・先講講天志嘅內容
・再講兼愛嘅實際用途，係對兼併嘅根本解決方法
・非攻係因為有利，攻打人哋國家往往無利
・墨子講利，其實係一種樂利主義
・明鬼睇落迷信，但原來有教化作用
・墨子講天志、兼愛都唔係佢被君王抹殺嘅原因，而係因為尚同，尚同思想令到大一統王朝唔必然存在
・講講天災同政治嘅關係，天災往往唔會消滅一個朝代，而係反映一個政府嘅能力
・仁心，係比難事更難嘅事

內容節錄：

「我哋可以見到陽文君認為自己係替天行道，所以咁就係義嘅行為。但墨子指出，替天行道其實只有兩個可能性，一，係唔相信天但以天嘅名去打人； 二，相信天而又話要替天行道只係好似幫鄰居教訓個仔，多管閒事。而陽文君即使義氣凜然咁講出替天行道，仍然只係講出義嘅名，而唔知道義嘅取。」
「天只係人兼愛嘅根源，鬼神只係賞善罰惡嘅保證。天無論幾想人去兼愛，鬼神就算點保證果報，路都係由人自己行出嚟。胡適總結得好好，「禍福全靠個人自己的行為，全是各人的自由意志招來的，並不由命定。」（本書，頁182）正正因為咁，墨子先相信人有能力去改變睇落無可能改變嘅嘢，社會依家睇落好混亂、好多戰爭？墨子或者會同我哋講社會只係由好多個自由意志組成，每一個自由意志都有可能兼愛，咁社會亦有可能兼愛，所以混亂唔係命定，人一定有能力改變，呢個係墨子給予人嘅信心。」

「而墨家嘅思想的確好能夠可以好似教會咁深入到當時平民百姓嘅心，因為無論咩國強咩國弱都好，只要一日國與國之間仲有戰爭，直接受苦嘅一定係平民百姓，貴族發起戰爭，但犧牲嘅就係平民。墨家嘅「非攻」思想最受惠嘅就係平民百姓，咁平民百姓愛好、投身到墨家當中就唔難理解。亦正正因為墨家嘅影響力咁大，所以墨子先可以同楚王「講數」。墨家，因為緊貼當時人民嘅苦楚，成為諸侯（政治勢力）以外嘅宗教力量，有住赴火蹈刃嘅弟子去守備弱國，呢一個以卵擊石強逼我哋去思考：如果北宋行政良善，咁又點會有梁山泊上嘅一百零八個好漢呢？墨子面對一隊隊軍隊所築成嘅高牆，選擇走到當時無知無助嘅百姓面前，阻止軍隊去蹂躪弱小。呢一種行為唔通唔係仁心嘅表現咩？我嘅問題係，同墨子同時代嘅人，仲有邊個比墨子更能夠表現出仁心呢？」
_____
Instagram： @cowgortalk
Patreon：patreon.com/cowgortalk
文字版：cowgortalk.wordpress.com