牛哥三個字|不快樂
リリース日:
如果我問你,老子係一個點樣嘅人?你可能會答我,輕鬆、世外高人、老、唔計較......好可能你唔會將老子同不快樂扣連。
但其實老子喺《道德經》提到:「衆人皆有餘,而我獨若遺。我愚人之心也哉……俗人昭昭,我獨若昏。俗人察察,我獨悶悶……衆人皆有以,而我獨頑似鄙。」透露住佢眼見眾人快樂,而唔明白點解可以快樂。
到底,老子經歷咗一個乜嘢思想改變,令到佢由不快樂嘅體會,最終擁有自在嘅快樂呢?
一齊用十五分鐘嘅時間,思考快樂同不快樂嘅關係。
內容提要:
「呢個世界正正就係矛盾,追求快樂,反而不快樂。承認不快樂,反而有可能快樂。點解會咁?因為承認,係一種真誠嘅表現。」
「表面嘅呈現就好似橫向嘅平面,人性嘅修養可以賦予立體嘅高度。如果人只著重平面,就會失去人嘅深度。用一個健身比喻去講,只追求完美、快樂、受人關注就好似健身只做上半身,結果有美麗堅壯嘅二頭肌、背肌、胸肌、腹肌,但係瘦弱嘅下身支撐唔到厚實嘅上半身,行兩級樓梯都會攰。」
「既然聖人都會不快樂,當你不快樂,請你記住人人都會不快樂,但呢個不幸係可能過去。」
「人總來都唔可以令一樣嘢消失,只可以轉化一樣嘢,所以人只有承認不快樂,先可以忘記不快樂、轉化不快樂,由a變成b,由c移去d」
「聆聽需要耐心,傾訴需要勇氣。」
「快樂星球下嘅人,人人都唔懂得快樂。
不快樂星球下嘅人,人人時快樂、時不快樂。」
_____
Instagram: @cowgortalk
Patreon:patreon.com/cowgortalk
文字版:cowgortalk.wordpress.com
牛哥三個字|不快樂